Unión Libertaria (organización de pensamento e acción anarquista de Ferrol) quere manifestar, unha vez máis, o seu apoio aos mariscadores encausados polas accións de oposición á entrada do gaseiro “Galicia Spirit”.
Que naquela posta en marcha “en probas” da regasificadora o auténtico espírito da Galiza libre e rebelde o representou o colectivo dos mariscadores da ría de Ferrol, que puxeron as súas embarcacións ao servizo da lexítima oposición dos habitantes de Ferrol á iniciativa caciquil de Tojeiro e a Xunta, arriscando de xeito noble e afouto a súas vidas, a súa liberdade e os ingresos dos seus fillos, xa que as embarcacións da 3ª lista empregadas para obstaculiza-la entrada do gaseiro eran as empresas nas que se baseaba a economía familiar.
Que aínda lembramos que REGANOSA pasou de ser promovida de xeito ilegal, ocupando e recheando dominio público marítimo-terrestre para un fin distinto ao autorizado a ser participada pola Xunta de Galicia e ser considerada por Conselleiros de Industria de distintos pelaxes como “estratéxica para Galiza”, tendo mesmo a garantía de que as posíbeis perdas serían cubertas con cartos públicos.
Que nesta época de dictadura dos mercados e de grave sumisión das institucións que deberían garantir o benestar e a seguridade públicas, a desobediencia civil dos mariscadores conta -como contou no peirao e na rúa- con todas as nosas simpatías e coas da meirande parte da sociedade ferrolá, que fronte á violencia dos antidisturbios amosou unha capacidade mobilizadora e solidaria que entronca coa dos feitos de hai 40 anos. Que, fronte a todo tipo de coaccións de despacho e porra, o peito aberto e a cabeza levantada dos oito acusados representaban-nos a todos. E que, xa que a complicidade da clase política coa codiza empresarial non dubidou a condearnos a toda a poboación de Ferrolterra ás terribeis consecuencias que unha actividade tan perigosa, a carón dunha planta química, a menos de dous quilómetros do peirao de combustíbeis do Bispón, do Arseal Militar e dos núcleos de poboación das vilas de Mugardos, Fene e Ferrol; solicitamos comparti-la condea que esa institución que leva o fermoso nome de Xustiza poda impoñer aos compañeiros imputados.
Mar 26 2012
En apoio aos mariscadores…
Abr 29 2011
1º de maio anarcosindical en Ferrol
A loita obreira, da man da anarcosindical, sae á rúa de novo en Ferrol este primeiro de maio. Dende Unión Libertaria queremos apoiar esta iniciativa da CNT e chamar á participación nesta xornada reivindicativa e de lembranza dos homes e mulleres que deron o mellor deles mesmos na defensa dos dereitos dos traballadores e traballadoras. Especialmente daqueles anarquistas que pagaron dramaticamente coa súa vida nos feitos acontecidos no mes de maio de 1886 en Chicago. Mortos nas revoltas e condenados á forca polas súas ideas pagaron un prezo moi alto por mellorar as condicións laborais e conquistar a xornada de oito horas. Igual que entón as frontes de loita seguen abertas e a emancipación da clase traballadora continúa sendo unha materia pendente.
Nun mundo globalizado e en crise, os poderes fácticos das finanzas e da política servil continúan o seu acoso e derrubo da clase traballadora. Os excesos especulativos da banca en conivencia coas estruturas do poder político están a precarizar as condicións de traballo e os dereitos conquistados. Os miles de millóns que o estado concedeu ás entidades financeiras para tapar buracos son a costa das sucesivas reformas laborais e da merma de servizos, dereitos e prestacións. Dereitos e prestacións que sendo froito do teu traballo ningún pai estado está a regalar.
Esta casta empresarial e financeira caciquil está a especular de novo cos millóns recibidos, a subir soldos de altos cargos e a deslocalizar a produción por medio mundo para explotar e escravizar mentres aquí precarizan e piden “esforzos” en nome da sacrosanta produtividade. Coa complicidade dos sindicatos subvencionados e vendidos ao poder queren facernos máis escravos do traballo asalariado mentres uns poucos ricachóns enchen cada vez máis os petos.
Nesta sociedade consumista e desclasada, a unidade na loita obreira está esnaquizada polos manexos do poder asentado na socialdemocracia capitalista de un paso adiante dez pasos atrás, no sindicalismo cómplice e traidor e na total renuncia a construír un novo modelo de sociedade descapitalizada, libre, responsable, cooperativa e xusta. Unha sociedade verdadeiramente democrática e horizontal na que o traballo sexa participación solidaria e responsable. Na que o pobo en liberdade sexa dono do seu destino.
As frontes abertas son moitas e as loitas inmensas. Unha delas, a da dignidade dos traballadores e traballadoras estará na rúa este primeiro de maio en Ferrol. Nós xa estamos fartas. Xa abonda de mentiras e falsas promesas. Que non te enganen máis. Únete á mobilización e deixa oír a túa voz. Participa este primeiro de maio en Ferrol na manifestación coa CNT.
Unión Libertaria
Ferrol 29 de abril
Comments Off
Abr 14 2011
Unión Libertaria chama á participación na manifestación do 26 de abril contra o desaloxo da Casa das Atochas
O grupo anarquista Unión Libertaria de Ferrol, chama a toda a xente a participar activamente na manifestación convocada o vindeiro 16 de abril, ás 16 horas, no Campo da Leña, contra o desaloxo da Casa das Atochas.
Novamente o estado e os seus esbirros amosan a súa verdadeira face, como ferramentas do empresariado contra as persoas. Nesta ocasión, a xustiza e as forzas de orde pública traballaron para unha empresa privada, a do especulador Pérez Paz, S.L. Mentres facían desaparecer un fermoso espazo de creación e loita como é a Casa das Atochas, amparaban as actividades ilegais de Pérez Paz S.L., desfacendo o edificio, probablemente sen licencia de obras e sen condicións de seguridade de ningún tipo. Deste xeito ficou claro que os especuladores non desexaban utilizar o edificio, senón unicamente desaloxar ás persoas que alí estaban facendo actividades; a súa conducta antisocial foi apoiada pola xustiza e as forzas de orde pública.
Pola nosa parte, desexamos manifestar todo o noso apoio ao grupo de persoas que ten activado a Casa das Atochas como un espazo de loita e creación para todas as persoas que por alí quixeron pasar. Estamos seguros de que a Casa das Atochas segue viva e volverá a activarse nese ou noutros espazos. Porque pensamos que a vosa loita é a de todos e todas, chamamos á xente a participar na manifestación do vindeiro sábado e a reactivar o proxecto onde queira que continúe o seu camiño.
Unión Libertaria
Ferrol, 14 de abril de 2011
Comments Off
Páxina seguinte »
